کراچی میں پولیس اور حساس اداروں نے مشترکہ کارروائی کرتے ہوئے دہشتگردی کا بڑا منصوبہ ناکام بنادیا۔ کارروائی میں بھارتی خفیہ ایجنسی را کے 2 انتہائی خطرناک دہشت گرد گرفتار کرلئے۔
کراچی پولیس کے بیان کے مطابق کورنگی پولیس نے کراچی میں دہشتگردی کا بڑا منصوبہ ناکام بنایا۔ کورنگی صنعتی ایریا پولیس اور حساس اداروں نے تکنیکی بنیادوں پر مشترکہ ٹارگیٹڈ کارروائی کی۔
پولیس کے مطابق کارروائی میں 2 انتہائی مطلوب دہشتگرد گرفتار ہوئے اور انکے پاس سے دو ہینڈ گرنیڈ، ایک 9 ایم ایم پستول اور گولیاں برآمد کی گئی ہیں، گرفتار دہشتگردوں کی شناخت خاور حسین ولد عبدالغنی اور جابر ولد مشتاق کے نام سے ہوئی ہے۔
پولیس کے جاری بیان کے مطابق گرفتار ملزمان سے ابتدائی تفتیش میں اہم انکشافات ہوئے۔ ملزمان بیرون ملک سے ملنے والے ٹارگٹ کی ریکی کرتے تھے اور تمام معلومات بیرون ملک بھیجتے تھے۔
پولیس کے جاری بیان میں بتایا گیا ہے کہ ملزمان کو مختلف غیر ملکی بینک اکاؤنٹس کے ذریعے لاکھوں روپے بھی موصول ہو چکے ہیں، ملزمان سے تفتیش جاری ہے جس میں مزید انکشافات متوقع ہیں۔