کراچی میں میٹرک امتحانات کا آغاز 7 مئی سے ہوگا، موبائل فون امتحانی مراکز لانے پر پابندی عائد

کراچی میں ثانوی تعلیمی بورڈ کے تحت نویں اور دسویں جماعت کے سالانہ امتحانات کا آغاز 7 مئی سے ہورہا ہے۔ نقل کی روک تھام کیلئے موبائل فون امتحانی مراکز لانے پر پابندی عائد کردی گئی۔

اے آر وائی نیوز کی رپورٹ کے مطابق کراچی میں 7 مئی سے شروع ہونے والے میٹرک امتحانات میں شہر کے ساتوں اضلاع سے مجموعی طور پر ساڑھے 3 لاکھ سے زائد طلباء اور طالبات حصہ لیں گے۔ 

چیئرمین میٹرک بورڈ کی جانب سے طالب علموں پر امتحانی مراکز میں موبائل فون لانے پر پابندی عائد کردی گئی ہے اور حکام کو اس پابندی پر سختی سے عملدرآمد کی ہدایت کی ہے۔

چیئرمین میٹرک بورڈ شرف علی شاہ نے پریس کانفرنس میں واضح کیا ہے کہ پابندی کے باوجود اگر کوئی طالبعلم موبائل فون امتحانی مرکز میں لایا تو اس کو ضبط کر لیا جائے گا۔

شرف علی شاہ نے بتایا کہ 7 مئی سے شروع ہونے والے نویں اور دسویں جماعت کے سالانہ امتحانات کی تیاریاں مکمل کر لی گئی ہیں۔ امتحانات میں 3 لاکھ 65 ہزار سے زائد طلبہ وطالبات شرکت کر رہے ہیں، جن کے لیے 505 امتحانی مراکز قائم کیے گئے ہیں۔

انہوں نے بتایا کہ بورڈ کے آفیسرز امتحانی پرچوں کی ترسیل پر مامور ہونگے۔ ثانوی تعلیمی بورڈ نے تمام طلبا و طالبات اور اساتذہ کی آسانی کیلیے آن لائن کمپیوٹرائزڈ ایڈمٹ کارڈز پر امتحانی مراکزبھی پرنٹ کر دیے ہیں۔

Spread the love
جواب دیں
Related Posts