سال 2022 کا دوسرا اور آخری سورج گرہن 25 اکتوبر کو ہوگا۔ پاکستان میں بھی سورج گرہن دیکھا جاسکے گا لیکن پاکستان میں سورج کو جزوی طور پر گرہن لگے گا۔
اے آر وائی نیوز کی رپورٹ کے مطابق ماہرین فلکیات کا کہنا ہے کہ یورپ اور ایشیا کے مغربی حصے، شمالی افریقہ اور مشرقِ وسطی میں سورج گرہن ہوگا۔ سورج گرہن کا دورانیہ چار گھنٹے کے قریب ہوگا۔ سورج کو دوپہر 1 بج کر 58 منٹ پر گرہن لگے گا، اور اختتام 6 بج کر 2 منٹ پر ہوگا۔
پاکستان میں سورج کو گرہن جزوی طور پر لگے گا، کراچی میں جزوی سورج گرہن کا آغاز دوپہر3 بج کر57 منٹ پر ہوگا۔ کراچی میں 5 بج کر1 منٹ پر جزوی سورج گرہن عروج پر ہوگا، جزوی سورج گرہن کا اختتام 5 بج کر 56 منٹ پر ہوگا۔
ماہر فلکیات ڈاکٹر جاوید اقبال کے مطابق جزوی سورج گرہن کا دورانیہ 2 گھنٹے ہے، جزوی سورج گرہن پاکستان سمیت یورپ، ایشیا اور شمال مشرقی افریقہ کے حصوں میں دیکھا جائے گا۔
انھوں نے کہا تھا کہ اگلے سال کا پہلا مکمل سورج گرہن 20 اپریل 2023 کو ہوگا، آنے والے سال کا مکمل سورج گرہن پاکستان میں نظر نہیں آئے گا۔
