افغانستان کے دارالحکومت کابل کی ایک درس گاہ میں امتحان کے دوران دھماکے کے نتیجے میں طالبات سمیت 19 افراد جاں بحق ہوگئے جبکہ متعدد زخمی ہیں۔
غیرملکی میڈیا رپورٹس کے مطابق کابل شہر کے مغرب میں دشت برچی کے علاقے میں واقع ’کاج‘ تعلیمی مرکز میں ہوا۔ دھماکہ مبینہ طور پر خودکش حملے کے نتیجے میں ہوا۔
کابل میں پولیس کا کہنا ہے کہ دھماکے میں کم از کم 19 افراد ہلاک اور متعدد زخمی ہوئے ہیں۔ ہلاک اور زخمی ہونے والوں میں بڑی تعداد طالب علموں کی ہے جس میں طالبات بھی شامل ہیں۔
کابل کے پولیس ترجمان خالد زادران کا بتانا ہے کہ جمعہ کی صبح کابل کی تعلیمی ادارے میں طالب علم امتحان دے رہے تھے کہ خودکش حملہ آور نے خود کو دھماکا خیز مواد کی مدد سے اڑا دیا۔
دھماکے کے بعد واقعے کی ویڈیو اور تصاویر سوشل میڈیا پر بھی شیئر کی جا رہی ہیں جبکہ افغان سکیورٹی فورسز نے دھماکے کی جگہ سے شواہد اکٹھے کر کے تحقیقات کا آغاز کر دیا ہے۔
کابل شہر کے جس علاقے دھماکہ ہوا وہاں رہنے والی اکثریت کا تعلق اقلیتی ہزارہ برادری سے ہے جنھیں ماضی میں بھی متعدد بار حملوں میں نشانہ بنایا جا چکا ہے۔
