پاکستان سے رواں سال حج کیلئے فلائٹ آپریشن کا آغاز 9 مئی سے ہورہا ہے جو 9 جون تک جاری رہے گا۔ اس سال سرکاری کوٹہ کے تحت 69 ہزار پاکستانی حج کی سعادت حاصل کریں گے۔
جیو نیوز کے مطابق ترجمان مذہبی امور کا کہنا ہے کہ پہلے 15 روز تمام پروازیں براہِ راست مدینہ منورہ ایئر پورٹ اتریں گی، 24 مئی تا 9 جون بیشتر پروازیں جدہ ایئر پورٹ پر اتریں گی۔
پہلے روز 11 پروازوں سے 2160 عازمین سعودی عرب جائیں گے، پہلے روز اسلام آباد سے 3 پروازوں سے 680 عازمینِ حج سعودی عرب جائیں گے۔
پہلے روز کراچی سے 2 پروازوں سے 330 عازمینِ حج، لاہور سے 3 پروازوں سے 670 عازمینِ حج روانہ ہوں گے۔ ملتان سے پہلے روز 2 پروازوں سے 329 عازمینِ حج، سیالکوٹ سے 1 پرواز سے 151 عازمین ِمدینہ منورہ پہنچیں گے۔
کوئٹہ سے پہلی حج پرواز 11 مئی اور سکھر سے 27 مئی کو روانہ ہو گی۔ 259 حج پروازوں کے ذریعے 68 ہزار سے زائد سرکاری عازمینِ حج سعودی عرب پہنچیں گے، حج فلائٹ آپریشن 9 جون کو اختتام پزیر ہو گا۔ 20 جون کو پہلی پرواز حجاجِ کرام کو لے کر وطن واپس پہنچے گی۔
پاکستانی عازمین کیلئے حج ایپ متعارف کروا دی گئی جسے ہر حاجی کیلئے ڈاؤن لوڈ کرنا لازمی ہے، حکومت کا عازمین کے ساتھ رابطہ اس ایپ کے تحت ہی ہوگا۔ حجاج کو پاکستان سے فری سم ملے گی، وہاں سے وٹس ایپ کال بھی ہوسکے گی، ایک ہی رنگ کے مفت بیگ حجاج کو ملیں گے۔ بیگ پر کیو آر کوڈ درج ہوگا جس سے پتہ چل جائے گاکہ حاجی کہاں سے آیا ہے کہاں ٹھہرا ہے۔