میاں شہباز شریف نے وزارت عظمیٰ کا منصب سنبھالنے کے بعد کراچی کا دورہ کرنے کا فیصلہ کیا ہے۔ وزیراعظم ہاؤس کے ترجمان کے مطابق شہباز شریف کل 13 اپریل بروز بدھ کراچی کا دورہ کریں گے۔
ترجمان کے مطابق وزیر اعظم شہباز شریف مزار قائد پر حاضری دیں گے۔ انہوں نے کہا کہ شہباز شریف وزیر اعلیٰ ہاؤس میں ملاقاتیں بھی کریں گے۔
وزیراعظم شہباز شریف نے آج پارلیمنٹ لاجز میں ایم کیوایم وفد سے بھی ملاقات کی۔ ملاقات میں وزارتوں اور ایم کیوایم کے ساتھ کئے گئے معاہدوں پر مشاورت کی گئی۔ وزیراعظم نے حکومت بنانے اور چلانے کیلئے ایم کیو ایم کے ساتھ کو ناگزیر قرار دے دیا۔
وزیراعظم شہباز شریف کل ایک روزہ دورہ کراچی کے دوران ایم کیوایم پاکستان کے بہادرآباد میں واقع مرکز کا بھی دورہ کریں گے جبکہ مزار قائد پر حاضری کے موقع پر بھی ایم کیو ایم پاکستان کی قیادت وزیراعظم شہباز شریف کے ہمراہ ہوگی۔
واضح رہے کہ شہباز شریف گزشتہ روز پاکستان کے 23 ویں وزیراعظم منتخب ہوئے تھے۔ وزیراعظم شہباز شریف کا بیان میں کہنا تھا کہ ہماری ترجیح مہنگائی پر قابو پاکر عوام کو ریلیف فراہم کرنا ہوگی۔
انہوں نے مزید کہا کہ ہم سب مل کر پاکستان کو عظیم قوم بنائیں گے جبکہ دیگر ممالک سے باہمی احترام اور برابری کی بنیاد پر تعلقات استوار کریں گے۔
