دھابیجی پمپنگ اسٹیشن پر بجلی کے بریک ڈاون سے پھٹنے والی لائنوں کی کراچی واٹر اینڈسیوریج بورڈ بر وقت مرمت نہ کرسکا۔ کراچی کے شہریوں کو اس وقت پانی کی شدید قلت کا سامنا ہے۔
شہرقائد کو پانی فراہم کرنے والے چار ہائیڈرنٹ بند ہونے سے صورتحال مذید خراب ہو گئی ہے۔ محکمہ بلدیات یا واٹر بورڈ حکام کی جانب سے اب تک کوئی نوٹس نہیں لیا گیا ہے۔
نارتھ کراچی،فیڈرل بی ایریا،گلشن اقبال13ڈی ،لیاری، کیماڑی، ڈیفنس ہاوسنگ اتھارٹی،کورنگی ،ملیر ،اختر کالونی، نارتھ ناظم آباد،ناظم آباد،ماڑی پور، شیرشاہ، بلدیہ ٹاون سمیت متعدد علاقوں میں گزشتہ پانچ روز پانی سے پانی کی سپلائی بالکل بند ہے۔
روزنامہ جنگ کی رپورٹ کے مطابق لوگوں کا کہنا ہے کہ واٹر بورڈ پہلے ہی سات روز بعد ایک سے دو گھنٹے پانی سپلائی کرتا تھا۔ حالیہ بارشوں کے دوران حب ڈیم مکمل بھر چکا ہےجبکہ دریائے سندھ میں بھی پانی کی کمی نہیں ہے لیکن واٹر بورڈ نے ان دنوں میں بھی کراچی کے شہریوں کو پانی فرا ہمی سے محروم رکھا ہوا ہے۔
رپورٹ کے مطابق گزشتہ تین سال سے واٹر بورڈ کا ڈسپلن بہت زیادہ خراب ہے ادارے میں صارفین کی شکایات کے اندراج کوئی نظام نہیں ہے۔ سپرنڈنگ انجینئر ، ایکسئن حضرات اپنے علاقوں کے دورے نہیں کرتے، انجینئرز، افسران اور فیلڈ اسٹاف کی کارکردگی چیک کرنے کا کوئی نظام نہیں ہے۔
