دنیا کے مقبول ترین کھیل فٹبال کا قطر میں آغاز ہوچکا ہے۔ قطر کے آٹھ مختلف اسٹیڈیمز میں ورلڈکپ کے میچز کھیلے جارہے ہیں۔ بین الاقوامی ٹورنامنٹ کے مدنظر دنیا بھر سے مداح قطر پہنچ رہے ہیں اور ورلڈکپ کے دوران سیکیورٹی کیلئے قطر کی حکومت نے سخت انتظامات کئے ہیں۔
سیکیورٹی کے سلسلے میں قطر کو پاکستانی افواج کی خدمات بھی حاصل ہیں۔ پی این ایس تبوک فیفا ورلڈ کپ 2022 کے دوران قطر حکومت کو میری ٹائم سیکیورٹی میں معاونت فراہم کریگا۔
ترجمان پاک بحریہ کے مطابق پاک بحریہ کا جہاز پی این ایس تبوک قطر کی بندرگاہ پہنچ گیا۔ قطر کی بندرگاہ آمد پر پاکستانی سفارتی حکام اور میزبان بحریہ کے اعلی افسران نے جہاز کا استقبال کیا۔
Pakistan Navy Ship Tabuk has arrived at port in Qatar to provide assistance in maritime security to Qatari government during FIFA World Cup@PakistanNavy @dgprPaknavy @PakinQatar #FIFAWorldCup https://t.co/UDT87KdTmG pic.twitter.com/yEmIsHmY8V
— Radio Pakistan (@RadioPakistan) November 22, 2022
جہاز کے کمانڈنگ آفیسر نے میزبان بحریہ کے اعلی حکام سے ملاقاتوں کے دوران فیفا ورلڈ کپ 2022 کی میری ٹائم سیکیورٹی پر تبادلہ خیال کیا۔
پی این ایس تبوک کی انٹرنیشنل میگا ایونٹ فیفا ورلڈ کپ 2022 کے دوران میری ٹائم سیکیورٹی میں معاونت پاک بحریہ کی پیشہ ورانہ صلاحیتوں پر اعتماد کا اظہار ہے۔
واضح رہے رواں سال اگست میں وفاقی کابینہ نے فیفا ورلڈ کپ کی سیکیورٹی کے لئے قطر حکومت اور پاک فوج کے مابین معاہدے کی منظوری دی تھی۔ قطر نے فٹبال ورلڈ کپ کی سیکیورٹی کیلئے پاک فوج سے مدد مانگی تھی۔
