وزیراعظم شہباز شریف کی بنائی گئی کمیٹی کی سفارشات کے بعد سینسر بورڈ سے کلیئر ہونے کے بعد کراچی سمیت ملک کے مختلف حصوں میں فلم جوائے لینڈ نمائش کیلئے سینما گھروں میں پیش کردی گئی لیکن پنجاب میں ریلیز نہ ہوسکی۔
برطانوی نشریاتی ادارے (بی بی سی) کی اردو سروس کی رپورٹ کے مطابق جوائے لینڈ کراچی کے سینما گھروں میں پردوں کی زینت بن گئی ہے لیکن پنجاب کے محکمہ اطلاعات و ثقافت نے فلم کو نمائش سے روک دیا۔
تنازعات، افواہوں اور قیاس آرائیوں کے درمیان، متعدد بین الاقوامی فلمی میلوں میں ایوارڈز اور داد وصول کرنے والی پاکستانی فلم جوائے لینڈ کو کراچی میں سب سے بڑے ملٹی پلیکس سینما گھر میں نمائش کیلئے پیش کیا اور فلم کے شوز ہاؤس فل رہے۔
بی بی سی کی رپورٹ کے مطابق سینما میں آنے والے فلم بینوں نے اس فلم کی تعریف کی لیکن پنجاب کے عوام سینما گھروں میں فلم دیکھنے سے محروم ہیں کیونکہ وہاں فلم کی نمائش صوبائی محکمہ اطلاعات و ثقافت کی جانب سے آخری وقت پر روک دی گئی تھی۔
صوبائی محکمہ داخلہ و ثقافت کی جانب سے 17 نومبر کو جاری کردہ نوٹی فکیشن کے مطابق اگلے احکامات تک فلم جوائے لینڈ سینما گھروں میں نہیں لگائی جاسکتی۔ فلم کو نمائش کی اجازت نہ دینے کی وجہ اسکے خلاف موصول ہونے والی مسلسل شکایات ہیں۔
واضح رہے وزیراعظم شہباز شریف کی جانب سے قائم کردہ خصوصی کمیٹی نے فل بورڈ کے بعد فلم کو چند کٹس کے ساتھ نمائش کی اجازت دی تھی، جس سے فلم دیکھنے کے خواہش مند لوگوں میں خوشی کی لہر دوڑ گئی تھی، اور سول سوسائٹی بھی اسے اپنی کامیابی مان رہی تھی۔
