عدالت کا کراچی میں فلائی اوورز، پیڈسٹرین برجز اور پبلک پراپرٹیز سے سائن بورڈ ہٹانے کا حکم

سندھ ہائی کورٹ نے کراچی میں فلائی اوورز، پیڈسٹرین برجز اور تمام پبلک پراپرٹیز سے ہر قسم کے سائن بورڈز ہٹانے کا حکم دے دیا۔

سندھ ہائی کورٹ میں جسٹس عرفان سعادت خان کی سربراہی میں 2 رکنی بینچ کے روبرو اشتہاری کمپنیز کی درخواست پر سماعت ہوئی، جس میں عدالت نے بل بورڈز اور ہورڈنگز کیخلاف موثر کارروائی کا حکم دے دیا۔

جسٹس عرفان سعادت خان نے ریمارکس دیے کہ سپریم کورٹ کے احکامات کے مطابق بل بورڈز کیخلاف کارروائی کی جائے۔ ساتھ ہی غیر قانونی بورڈز لگوانے والے سرکاری افسران کیخلاف بھی کارروائی ہوگی۔ ناظر مقرر کرکے شہر بھر میں کارروائیوں کا جائزہ بھی لیا جائے گا۔

عدالت نے سندھ حکومت، کے ایم سی اور تمام کنٹونمنٹ بورڈز کو 15 نومبر تک موثر کاروائی کرکے رپورٹ پیش کرنے کا حکم دے دیا۔

واضح رہے کہ اشتہاری کمپنیز نے بل بورڈز پر کنٹونمنٹ بورڈ کی جانب سے ٹیکس لیوی کے خلاف عدالت سے رجوع کررکھا ہے۔

سپریم کورٹ نے 17 اکتوبر 2018ء کو پبلک پراپرٹیز، اوور ہیڈ برج، پیڈ اسٹرین برجز اور سروس لائنز پر بل بورڈز، ہورڈنگز اور پینافلیکس نہ لگانے کا حکم دیا تھا۔ سندھ ہائی کورٹ نے سپریم کورٹ کے فیصلے پر من وعن عمل کرنے کا حکم دیدیا۔

Hurmat Majid