ایشیا کپ میں کرکٹ کا سب سے بڑا مقابلہ آج پاکستان اور بھارت کی ٹیموں کے درمیان ہونے جارہا ہے۔ دبئی کے خوبصورت اسٹیڈیم میں روایتی حریف آج شام سات بجے مدمقابل ہوں گے۔
پاکستان کرکٹ ٹیم کے کھلاڑی کھیل کے ساتھ ساتھ ملک میں مشکلات سے دوچار سیلاب متاثرین کو نہ بھولے، کھلاڑی آج سیاہ پٹیاں باندھ کر میچ کھیلنے کیلئے میدان پر اتریں گے۔
ٹیم منیجر کے مطابق سیاہ پٹیاں باندھنے کا مقصد پاکستان میں سیلاب متاثرین کے ساتھ اظہارِ یکجہتی کرنا ہے۔ قومی ٹیم کے منیجر نے بھی مخیر حضرات سے درخواست کی ہے کہ وہ وزیرِ اعظم شہباز شریف کے ریلیف فنڈ میں عطیات جمع کرائیں۔
قومی ٹیم کے کپتان بابر اعظم نے بھی گزشتہ روز پریس کانفرنس میں سیلاب متاثرین کی امداد کا اعلان کیا تھا۔ کپتان بابر اعظم نے تمام افراد سے سیلاب متاثرین کی مدد کی اپیل بھی کی تھی۔
واضح رہے ملک بیشتر حصوں میں مون سون کی شدید بارشوں کے بعد سیلاب نے تباہی مچادی ہے۔ این ڈی ایم اے کی رپورٹ کے مطابق بارشوں اور سیلاب سے ملک بھر میں اب تک 1 ہزار 33 افراد زندگی کی بازی ہار چکے ہیں۔
این ڈی ایم اے کے مطابق ڈیڑھ ہزار سے زائد افراد زخمی ہیں جبکہ ساڑھے 6 لاکھ سے زائد مکانات کو سیلاب کی وجہ سے نقصان پہنچا ہے۔
