سندھ میں انسانی حقوق کی خلاف ورزیوں میں اضافے کا انکشاف ہوا ہے۔ سب سے زیادہ شکایات سندھ پولیس کے خلاف رپورٹ ہوئی ہیں۔
ایکسپریس نیوز کے مطابق محکمہ انسانی حقوق سندھ نے 5 ماہ کی کارکردگی رپورٹ جاری کی ہے جس میں صوبے کے مختلف محکموں کی جانب سے کی جانے والی انسانی حقوق کی خلاف ورزیوں کے اعداد و شمار درج ہیں۔
محکمہ انسانی حقوق کی رپورٹ کے مطابق کراچی سمیت سندھ بھر میں 5 ماہ کے دوران انسانی حقوق کی 1 ہزار 271 خلاف ورزیاں رپورٹ ہوئیں۔ جن میں حبس بے جا، ہراساں، مبینہ زیادتی، خودکشی،بدفعلی، قتل، اغوابرائےتاوان شامل ہیں۔
ایکسپریس نیوز کے مطابق محکمہ انسانی حقوق کے ڈپٹی ڈائریکٹر شاہد ابڑو کا کہنا ہے کہ سندھ میں سب سے زیادہ 786 شکایات پولیس کے خلاف رہیں۔ پولیس کے خلاف کی گئی شکایات پر اجلاس بلانے اور ایکشن کے لیے آئی جی سندھ کو آگاہ کردیا ہے۔
رپورٹ میں مزید بتایا گیا ہے کہ پولیس کے بعد دوسرے نمبر پر محکمہ ریونیو، تیسرے نمبر پر تعلیم اور محکمہ محنت رہے۔ سندھ بھر میں مبینہ زیادتی کے 43، خودکشی کے 94 ،اغوا برائے تاوان کے 157 اور قتل کے 373 کیسز رپورٹ ہوئے۔