جامعہ کراچی کے اساتذہ نے سلیکشن بورڈز میں تاخیر کے خلاف ایکشن کمیٹی کے تحت جمعرات کو یوم ِ سیاہ منانے اور منگل کو علامتی بھوک ہڑتال کا اعلان کر دیا ہے۔
جامعہ کراچی کے اساتذہ کا کہنا ہے کہ سلیکشن بورڈز شیڈول کے اجراء کے لیے اساتذہ کا احتجاج جاری رہے گا- ایکشن کمیٹی کے نمائندوں نے جامعہ کراچی میں پریس کانفرنس کرتے ہوئے اعلان کیا کہ اساتذہ کو ان کے جائز حق کی ادائیگی میں تاخیر برتی جا رہی ہے ۔
ایکشن کمیٹی کا کہنا تھا کہ سلیکشن بورڈ میں تاخیر کے خلاف اساتذہ نے از خود انتظامیہ کو مجبور کرنے کیلئے جدوجہد کا آغاز کیا ہے تاکہ سلیکشن بورڈ میں غیر ضروری تاخیر کو روکا جا سکے۔
پریس کانفرنس کے مطابق سلیکشن بورڈ کے لئے جامعہ کراچی نے 2019 میں مختلف شعبہ جات میں فیکلٹی کی اسامیوں کے لیے درخواستیں طلب کی تھیں جس کی آخری تاریخ 30 جون 2019 دی گئی تھی۔
جامعہ کراچی کے اساتذہ کے مطابق تین برس سے زائد عرصہ گذر جانے کے باوجود 2019 کے اشتہار کے تحت کسی ایک شعبے میں بھی تقرری نہیں کی جا سکی ہے۔
