پاکستان کرکٹ ٹیم کے کپتان بابراعظم دنیا کے بہترین بلے بازوں میں شمار کئے جاتے ہیں اور انکی دلکش کور ڈرائیو کے دنیا بھر میں مداح اور سابق کرکٹرز معترف ہیں۔
بابراعظم کی کور ڈرائیو کو اب نویں جماعت کے تعلیمی نصاب کا حصہ بنالیا گیا ہے۔ نویں جماعت کی فزکس کی کتاب میں بابراعظم کے کور ڈرائیو سے متعلق مثال دی گئی ہے۔
قومی ٹیم کے کپتان کے کور ڈرائیو کو وفاقی تعلیمی بورڈ کی نویں جماعت کی فزکس کی کتاب کے نصاب میں شامل کیا گیا ہے۔ نصاب میں کائی نیٹنگ انرجی (Kinetic Energy) سے متعلق مثال دی گئی ہے۔
مثال میں پوچھا گیا ہے کہ بابراعظم 150 j کی قوت سے کور ڈرائیو کھیلیں اور گیند کا وزن 120 گرام ہو تو یہ کس رفتار سے باونڈری پر پہنچے گی ؟
Babar Azam’s cover drive related question in 9th grade physics syllabus (federal board) (via Reddit) pic.twitter.com/I2Tc9HldsG
— Shiraz Hassan (@ShirazHassan) September 13, 2022
مثال کے دوسرے حصے میں لکھا گیا ہے کہ ایک فٹبالر 450 گرام کی فٹبال کو کس قوت سے کک کرے کہ وہ اس رفتار کو پہنچ سکے۔
بابر اعظم کی کور ڈرائیو کو نصاب میں شامل ہونے پر صارفین دلچسپ جوابات بھی دے رہے ہیں۔ جبکہ پاکستان سمیت دیگر ممالک میں بھی اس خبر کو شیئر کیا جارہا ہے۔
واضح رہے بابر اعظم کی ایک خاص پہچان ان کی کورڈرائیو بھی ہے دنیا بھر کے کرکٹرز نے بابر اعظم کی کور ڈرائیو کی تعریف کی بہترین کور ڈرائیوز کھیلنے پر لیجنڈری کرکٹرز نے بھی ان کی تعریف کی ۔
انضمام الحق، محمد یوسف، ناصر حسین اور سنیل گواسکر سمیت دنیا کے نامور کمنٹیٹرز بھی اپنے تجزیوں کے دوران نوجوانوں کو بابر اعظم کی بیٹنگ کو دیکھ کر ان کی طرح کور ڈرائیو سیکھنے کے مشورے دیتے ہیں۔
